Football (Ligue 1) - Fabrizio Ravanelli arriva ad Aiaccio ?
(A redazzioni d'Alta Frequenza) - U novu intrenori di l'AC Aiacciu sarà cunnisciutu oghji (vennari). Tutta a settimana, omu n'hà intesu di tutti i mammi, in Corsica ma micca solu, postu chì arimani sempri, u ghjurnali L'Equipe annunziava a ghjunta pussibuli di Rolland Courbis, nant'à u bancu corsu. Ma u coach d'Alger hà mandatu à caternu l'infurmazioni calchì ora dopu. Tuttu u mondu s'hè ghjiratu tandu ver di l'Italia, è più particularmenti in Turinu, duva ci hè Fabrizio Ravanelli. In un prima tempu, quissu quì hà dittu anch'ellu chì ùn ci era nisun cuntattu cù l'AC Aiacciu, ma appena più tardi ind'a sirata, France 3 Corse Via Stella annunziava di modu sicuru : "Fabrizio Ravanelli hè u successori d'Albert Emon à l'ACA". L'annunziu saria ancu cunfirmatu oghji da i dirighjenti di u club. S'è iss'infurmazioni hè cunfirmata, si vidaria sbarcà in François Coty un parsunaghju assai mediaticu, un anzian attaccanti internaziunali talianu, carcu à trufei (Lega di i Campioni 1996, cuppa UEFA 1993, Campiunatu d'Italia parechji volti, cù a Juventus è a Lazio di Roma, cuppa d'Italia, vici campionu di Francia o ancu finalistu di a cuppa d'Ingliterra). Malgradu tuttu, Fabrizio Ravanelli hè un ghjovanu intrenori, cù un diploma sicura, ma chì ùn hà mai intrenatu un club prufiziunali. Sicondu i nostri infurmazioni, iss'ultimu duvaria ghjunghja in Aiacciu cù un aghjuntu. L'infurmazioni sarà cunfirmata oghji, o andemi torna ver di una surpresa tamanta? A risposta sarà cunnisciuta da quì à pocu.
