Football (Ligue 1) - Belle fin de saison pour le SC Bastia à Rennes (1-2)
(A redazzioni d'Alta Frequenza) - Dopu avè cunnisciutu dubbiti maiò duranti a so staghjoni, u SC Bastia a compii cù a più bella manera grazia à una vittoria 2-1 in Rennes. Un successu acquistatu grazia à François Kamano, chì à a 21ima minuta hà ricivutu bè un billissimu centru di Palmieri, eppo à a 52ima minuta dopu à una corsa scema fin'è a zona di u guardianu è avè trapassatu nant'à u latu dui difensori. Una partita propiu duminata da i bastiacci, ancu malgradu a riduzzioni di u scartu à l'81ima da Pedro Henrique. Una vittoria chì parmetti à u Sporting di cullà quattru piazzi più sopra. Cù cinquanta punti è u 10imu postu, u Sporting faci a so più bella staghjoni dipoi u so ritornu in Liga 1 in u 2012 grazia à u travaghju di Ghislain Printant è di François Ciccolini. Quattru piazzi chì valini assai caru, postu chì i bastiacci t'avarani dui millioni d'auri di più di diritti TV di pettu à u mumentu di principià ss'ultimu scontru di a staghjoni 2015-2016 di Liga 1.
Sur le même sujet
