Football (Ligue 1) - AC Ajaccio : sanction aggravée pour Eduardo
(A redazzioni d'Alta Frequenza) - Nova sanzioni pà un ghjucadori di l'AC Aiacciu da l'istanzi di u ballò francesi, è si pò dì chì quissa quì hè assai inaspittata. In fatti, l'attaccanti aiaccinu Eduardo avia ricivutu à a fin di u mesi scorsu dui partiti di suspensioni frà u quali unu di modu attimpatu, da a cummissioni di disciplina di a LFP, dopu à l'intarvinzioni di a cummissioni chì rivedi ogni scontru pà un gestu ghjudicatu appena viulenti contr'à un ghjucadori di Valenciennes. L'ACA tandu avia fattu appellu da u cantu di a Lega, ma, dopu à a morti d'Antoine Sollacaro, avucatu di u club, dicisioni era stata presa di caccià iss'appellu quì. Malgradu tuttu, priciseghja l'ACA nant'à u so situ ufficiali, "l'istanzi naziunali ùn ani micca presu in contu issu ritiru, nè mancu u drama di a morti di l'avucatu di l'ACA è ani mantinutu a data di cunvucazioni d'Eduardo.' È u Cunsighju naziunali di l'etica di a Federazioni Francesi di Ballò, incaricata di trattà i casi d'appellu, hà sanziunatu à Eduardo issu sabbatu di dui scontri di suspensioni. A cundanna di prima prununziata da a LFP hè dunqua stata crisciuta. U presidenti aiaccinu Alanu Orsoni, particularmenti stumacatu da iss'avenimentu "disciplinariu" novu, hà annunziatu chì u club andaria "dunqua davanti à u tribunali, usendu tutti i ricorsi, è dinò quillu di a custituziunalità di un'entità chì si ni ridi cumplettamenti di a regula di dirittu."
