Football - Les clubs corses poursuivent leur préparation
(A redazzioni d'Alta Frequenza) - I clubs prufiziunali di ballò corsi cuntinueghjani a so priparazioni, cù parechji scontri amichevuli. Ssu vennari in fin di ghjurnata, in Corti, u GFC Aiacciu, chì colla in Liga 2, ghjucava contr'à u so vicinu di u CA Bastia, chì fala in Naziunali. A sorti di ssa partita hè stata dicisa in furia, postu chì l'aiaccini ani vintu sei à dui (un duppiettu di Pujol, un antru di Tshibumbu eppo rialisazioni di Youga è Poggi pà u GFCA, mentri chì Santelli è Damba ani riduttu u scartu pà i bastiacci). U Gazélec ghjucarà contr'à a squadra taliana di Livornu vennari chì veni. Pà contu soiu, l'AC Aiacciu, in staziu in Anglet, è dopu avè battutu à Colomiers è persu contr'à Toulouse in amichevuli, participartà stasera à a so ultima partita ind'i Midi Pyrénées. In fatti, i ghjucadori di Christian Bracconi scuntrarani in Balma a furmazioni di Luzenac, chì colla in Liga 2, ma ssa cullata hè stata ricusata da a Direzzioni Naziunali di Cuntrollu è di Gistioni. L'aiaccini ritruvarani a Corsica luni, prima d'accoglia in Timizzolu vennari chì veni u CAB, sempri in amichevuli. Infini, i ghjucadori è u staff di u SC Bastia partini oghji pà a Savoia è un staziu di una sittimana vicinu à u lavu di u Bourget, è ghjucarani stasera contr'à Evian Thonon Gaillard, club di Liga 1, prima di scuntrà a sittimana chì veni Clermont (Liga 2), è a furmazioni inglesi di Norwich City.
