Football - Le SC Bastia conteste le retrait de son statut professionnel
(A redazzioni d'Alta Frequenza) - Ogni ghjornu a so evuluzioni in u cartulari di l'avvena di u SC Bastia. Mentri chì marti, a DNCG di a LFP annunziava u ritiru di u statutu prufiziunali di u SC Bastia, a situazioni hè più cumplessa. In fatti, l'avisu di a DNCG di a LFP, nant'à u sughjettu, hè solu cunsultativu, postu chì a Federazioni Francesi di Ballò hè a sola entità, cù u so Cumitatu Esecutivu, ad avè u puteri di caccià u statutu prufiziunali à un club. U SC Bastia hà vulsutu pricisà parechji punti. Prima, sicondu u club, ùn c'hè micca riunioni di u COMEX di a FFF privista par avà, u club hè dunqua sempri prufiziunali oghji. Sicondu puntu, s'è u COMEX s'adunisci, dui suluzioni si prisentani, sempri sicondu u club : s'ellu hè mantinutu u statutu prufiziunali, u club pò riparta subbitu in Naziunali 1. In u casu cuntrariu, u Sporting duvarà prisintà torna u so bughjettu davanti a DNCG di a FFF. Terzu puntu, u club dumanda à essa integratu torna subbitu in Cuppa di a Liga, dopu essa statu squalificatu ssu marti par via sicondu a LFP di a perdita di u so statutu prufiziunali, chì u Sporting cuntesta dunqua cù forza. Un Sporting chì dinunzia una situazioni scema è una mancanza di rispettu da a parti di a LFP pà u club, i so ghjucadori è i so impiegati par via di l'inghjochi ditarminanti ch'ella raprisenta a cunservazioni o micca di u statutu prufiziunali. A seria Sporting ùn hè ancu à compia...
