Football - L'AC Ajaccio devrait passer lundi devant le CNOSF
Hè u sfuglittinu di l’istati, eppuri saria stata bè ch’idd’ùn asisti quissu : à pochi ghjorna di a prima ghjurnata di i campiunata di siconda divisioni è di Naziunali, ùn hè ancu chjara bè a situazioni di l’AC Aiacciu.
Missu una volta è po’ dui in Naziunali da a DNCG, l’ACA ùn hà ancu calatu u capu, i so dirigenti cuntinuvendu u travaddu par mantena la à gallu.
À senta ni à Alain Orsoni, u prisidenti di a holding, l’ACA hà fattu appellu à u Cumitatu Naziunali Ulimpicu è Spurtivu, da circà à cambià a dicisioni di a DNCG.
Issu passaghju davanti à u CNOSF – chì u so avvisu hè solu cunsultativu – si duvaria fà luni ch’entri. « Forsa ancu vennari, ma più sicuramenti luni », hà dittu Alain Orsoni.
Una guaranzia bancaria è u varsamentu di dui miliona è mezu pudariani cambià i cosi.
Par casu ch’iddu sichi pusitivu l’avvisu, a squadra passaria davanti à u COMEX di a Federazioni francesa di u Ballonu, da circà à essa ripresa in siconda divisioni. Saria quissu un scinariu ideali. Ma l’idea di riparta in Naziunali – è di sfrancà si la dunqua d’una pighjor’ falata – saria accolta ancu idda quant’è un beddu sullevu da a casa Bianca è Russa, chì cusì si pudaria tena u statutu prufiziunali è u centru di furmazioni.
In ugni manera, li tuccarà, à l’ACA, à passà una terza volta davanti à a DNCG.
Vali à dì chì, parvia di tutti issi cosi, pudariani ancu essa attimpati i primi ghjurnati di i campiunata di siconda divisioni è di Naziunali.
