Football (Coupe de France) - Le GFCO Ajaccio passe sans trembler contre Calvi (3-0)
(A redazzioni d'Alta Frequenza) - Pà l'ottesimu ghjiru di a Cuppa di Francia, u derby isulanu di issu sabbatu dopu meziornu sarà andatu à prò di u GFCO Aiacciu, chì si hè impostu trè reti à zeru contr'à u FC Calvi. Dopu à un primu periudu piuttostu à favori di i Balanini, i cosi ani da cambià duranti u sicondu tempu di u scontru. L'aiaccini in fatti ani da fà trimà i reti di i calvesi, una prima volta à a 67ima minuta, nanzi di duppià l'affari calchì stundetta dopu, eppo di chjoda l'affari à deci minuti di a fini. Una partita chì sarà stata ingaghjata da un cantu com'è da l'altru, i ghjucadori di Didier Santini essendu si mustrati cumbattivi è ùn appiendu micca à vargugnà si di issa disfatta, contr'à quilli di Dumenicu Veilex chì rializeghjani quì una settesima vittoria à a fila, qualisiasi a cumpetizioni. L'aiaccini passani dunqua à i 32imi di finali di a Cuppa di Francia, cù una scelta à a sorti chì sarà fatta luni in fin di ghjurnata ; ghjiru chì marcarà l'intrata ind'a cumpetizioni di i furmazioni di Lega 1, dunqua di l'AC Aiacciu. U SC Bastia ellu, sarà uppostu luni à sera à a squadra di Louhans-Cuiseaux, à 8 è 15, sempri ind'u quadru di iss'ottesimu ghjiru.
