Football (Coupe de France) - Le GFCO Ajaccio en route vers l'exploit contre Toulouse
(A redazzioni d'Alta Frequenza) - Dopu à i qualificazioni senza trimà di l'AC Aiacciu è di u Sporting Club di Bastia arisera (sabbatu), di modu rispittivu contru à Fréjus - Saint-Raphaël è Sochaux, u terzu raprisintanti isulanu, u Gazélec d'Aiacciu, pruvarà issu dopu meziornu (dumenica) à crià a suspresa buschendu u so ticchettu pà i 16i di finali di a Cuppa di Francia contr'à u Toulouse FC, squadra di Lega 1. A furmazioni aiaccina, avvezza di a cumpetizioni, si duvarà dà di rimenu contr'à un gruppu di qualità, appiendu rializatu una bunissima prima parti di campiunatu. Avversarii chì si misfidani malgradu tuttu di i "Diavuli Rossi", è chì s'aspettani à una partita ingaghjata, inde l'ambienza particulari di u stadiu Ange Casanova, pà cunfruntazioni simuli. U gruppu aiaccinu hè guasgi cumplettu ; Dumenicu Veilex t'avarà dunqua una larga scelta pà cumpona u so ondici. In casu di vittoria, u GFCO Aiacciu incatinaria un dicesimu successu à a fila, qualsiasi a cumpetizioni, è vidaria di fattu u so parcorsu cuntinuà inde issa prova di prestigiu. Un scontru chì prumetti, da principià à 3 ori.
