Football (Coupe de France) - Carton plein pour le SC Bastia et le GFCO Ajaccio
(A redazzioni d'Alta Frequenza) - Riescita tutali pà i dui squadri isulani chì dipustavani u 7imu ghjiru di a Cuppa di Francia eri (sabbatu). Prima, u Sporting Club di Bastia s'hè impostu largamenti contru à La Seyne-sur-Mer chì ghjoca in Prumuzioni d'Unori, 8-0. L'attaccanti di u Sporting si sò fatti piacè, cù un duppiettu di Maoulida è trè reti pà Suarez, mentri chì Moizini, Angoula è Sans ani cumplitatu l'affari. Un scontru chì hè statu arristatu un quartu d'ori, quandu chì u Sporting vincia 4-0, dopu à fumigeni lampati nant'à u tarrenu da sustenidori lucali. Da nutà dinò chì quilli di Bastia ani vistu u so bus tuccatu appinuccia dopu à a partita. Pà ciò chì tocca à u GFCO Aiacciu, ùn hè mai statu disturbatu da a squadruccia di Gières, postu chì i "Diavuli Rossi" si sò imposti 9-2, cù quattru reti di Colloredo, dui rialisazioni di Seymand è Poggi, è una reta di Sinapi, inveci chì Monaco è Lupo ani salvatu l'unori pà i lucali. U ballò corsu pruvarà à rializà u centu parcentu, cù u spiazzamentu issu dopu meziornu (dumenica) di u FC Calvi in Carnoux, duva elli sarani upposti à i marsighjesi di l'Entente Arménienne Ardziv, chì ghjoca in Divisioni d'Unori.
