Football (Coupe de France) - 16es de finale : le GFCO Ajaccio reçoit Troyes à Mezavia
(A redazzioni d’Alta Frequenza) - Seguita di i 16i di finali di a Cuppa di Francia di Ballò issa dumenica pà i squadri isulani. Dopu à l’eliminazioni surpesa di l’AC Aiacciu arimani (sabbatu) in Bourg-Péronnas, è aspittendu u spiazzamentu di u SC Bastia in Valenciennes à 6 ori di sera, u GFCO Aiacciu sarà uppostu à Troyes, furmazioni di Lega 2, in principiu di dopu meziornu. L’Aiaccini chì ani vistu a so seria di dodici successi à a fila, qualisiasi a cumpetizioni, piantata in Bayonne in Naziunali, vularani ripighjà fiatu davanti à u so publicu fendu cascà, dopu à Toulouse, una nova squadra prufessiunali. Ghjucadori di Troyes di i quali ci voli à malfidà si, elli chì ani eliminatu à Caen à u ghjiru scorsu, è stendu nant’à una bona dinamica in Lega 2. Pà ciò chì tocca à u gruppu isulanu, pochi cambiamenti duvariani essa rializati da Dumè Veilex. I « Diavuli Rossi » sperani chì a famosa « magia di a cuppa » falarà nant’à u Stadiu Ange Casanova, da pudè cuntinuà issa bella storia d’amori trà u Gazélec è issa cumpetizioni. Un scontru da principià à 3 ori.
Sur le même sujet
