Football (CFA) - Le CA Bastia promu en National !
(A redazzioni d'Alta Frequenza) - Dopu à i cullati di u Sporting Club di Bastia in Lega 1 è di u Gazélec in Lega 2, terza prumuzioni pà u ballò corsu cù u CA Bastia chì colla in Naziunali. Una cullata acquistata cù a manera, parchì i cabisti, chì aviani bisognu cà di un puntu pà l'accessioni, ani vintu 3-0 in Alfortville. À a 30a minuta, Romain Pastorelli scrivia a prima reta nant'à un penalty, nanzi di metta ni un'antra à a 41a. Un successu chjosu da l'hat-trick di l'attaccanti bastiacciu, chì hà segnatu à l'88a minuta a so 23a rialisazioni di a staghjoni. In issu mentri, Aubervilliers hà vintu 2-0 contr'à Calvi, una vittoria pà nulla di i franciliani. Parchì cù 101 punti, i bastiacci ani buscatu u so bighjettu pà u Naziunali, ma ani fattu dinò com'è i so vicini di u Sporting essendu sacrati campioni di u Gruppu A di CFA. U ballò corsu t'avarà dunqua a staghjoni chì veni quattru squadri ind'i trè primi divisioni, un affari strasurdinariu pà una tarra di 300 000 abitanti solu.
Sur le même sujet
