FLNC : Revendication d'actions et analyse politique
Photo d'archives Via Stella
Via un cumunicatu mandatu à Corse-Matin, hà presu a parolla u FLNC, passati l’alizzioni lighjislativi.
U muvimentu hè criticu monda à nantu à a stratigia lla maiurità tarrituriali, è rimpruvarighja à u statu francesu d’intarrà u Populu Corsu cù u so « sistema ecunomicu mundiali ».
« A scelta di cintralizà a strategia di gistioni in ghjiru à u Prisidenti di l’Esecutivu è a so squadra hè validata da Gilles Simeoni. A so via hè fatta è accirtata dipoi u 2017. Quiddi chì ùn ci adiriscini sò marginalizati, qual’ch’iddi sichini stati i so ingagiamenti storichi è i so cumpitenzi. Affaccani in l’universu puliticu corsu parsoni chì riprisentani ciò chì no’ chjamemu u « post naziunalismu », una forma di patriuttismu « bobò », d’autosuddisfazzioni rivindicata, qual’ch’iddu sichi u risultatu uttinutu », dici u muvimentu.
U FLNC vurria chì u Prisidenti di l’Esecutivu faccia accolta da custruì a strada di l’autoditirminazioni, circhendu i sinergii in Corsica è in Auropa, piuttostu chè in francia. U muvimentu clandistinu ramenta trè rivindicazioni fundamintali : a ricunniscenza ufficiali di u Populu Corsu, a missa in anda subitu d’un’autunumia pulitica transitoria è a ghjunta à l’autoditirminazioni da quì à cinqui anni, cù una difinizioni di u corpu alitturali.
U FLNC rivindichighja sedici azzioni, ma supr’à tuttu rendi umaghju à Yvan Colonna, « l’omu, u pastori, u militanti clandistinu ».
U muvimentu dinuncia l’attitudina di a francia cù u Populu Corsu è i so eletti, disprizzanti è suprana com’è mai. « Aspittemu sempri a virità pà l’assassiniu d’Yvan Colonna, ma sapemu chì no’ ùn l’avaremu mai. A francia hè di quiddi chì sani piattà u meddu i so vituperii ».
« Oghji, ciò chì tumba u Populu Corsu, hè a francia, u sistema ecunomicu mundiali, è una parti llu nosciu populu chì si ni faci complici. Oghji, ci voli à cambià di mudellu. Hè ciò chì no’ aspittemu da a guvirnanza naziunalista », dici u FLNC.
U cumunicatu si finisci incù issu missaghju mistiriosu : « cunfirmemu à Mathilde è David ».