Fin du conflit à l'hôpital Eugénie d'Ajaccio
(A redazzioni d'Alta Frequenza) - U cunflittu inde l'annessa Eugénie di l'uspidali d'Aiacciu, chì avia cuminciatu in principiu di settimana à l'iniziativa di a CFDT, s'hè compiu stasera (vennari). In fatti, un scontru trà u sindicatu è a direzzioni di u stabilimentu s'hè tinutu issu vennari, pà neguzià nant'à i sfarenti punti è brami di i parsunali in greva. Ci era dighjà statu una prima adunita marti, è dighjà si pudia risenta, ancu puru s'è omu era assai prudenti, una certa suddisfazioni. Oghji dunqua, a CFDT hà vintu nant'à l'insemi di i so rivindicazioni, chì purtavani rammintemu la frà altru nant'à i cundizioni di travaghju, l'accolta di i pazienti, o ancu nangt'à l'avvena di a struttura drentu à u prughjettu di u futuru uspidali novu pà a cità Imperiali. Quissa quì hà dumandatu chì un cumitatu di seguitu lucali sighi missu in ballu pà l'annessa Eugénie da l'Agenza Righjunali di a Saluta, com'è s'hà da fà pà u prossimu uspidali. Da nutà d'altrondi chì un Cumitatu d'Igieni di Securità è di i Cundizioni di Travaghju si tinarà luni, à a dumanda di a CFDT, in prisenza di i partenarii suciali, di a direzzioni, di a spizzioni di u travaghju è di i servizii tennichi pà vultà nant'à u raportu di a cummissioni di securità di l'uspidali Eugénie, avendu inghjinnatu rammintemu la un arrestu di u merri, ammintendu a sarratura di i lucali pà rializà travaghji di rinnovu impurtanti.
