Fièvre catarrhale et dispositif de l'Etat: le compte n'y est pas selon les professionnels
(A redazzioni d'Alta Frequenza) - Una riunioni publica d’infurmazioni nant’à i disguasti inghjinnati da a frebba catarrhale hè stata urganizata ssu marcuri ind’A Ghisunaccia da i sfarenti attori di u mondu agriculu. I prufiziunali vuliani prisintà à i pastori è à l’allivadori u dispusitivu di u Statu è fà cunnoscia a so riazzioni prima di racoglia quilli di i parsoni prisenti. Rammintemi chì u Statu hà annunziatu a dumenicata scorsa trè misuri pà l’allevi tocchi : a missa in ballu di un dispusitivu di cumpensazioni cù un aiutu eccezziunali chì hà da copra 70% di i perditi, una derugazioni dopu à un accordu cù l'autorità taliani pà l'espurtazioni di l'agnelli in Sardegna, è infini i vaghjoli ubligatorii è di gratisi pà una prutezzioni più bona è contr'à a diffusioni di a malatia. Pà i prufiziunali, a riposta hè più cà chjara : ùn ci hè micca u contu pà ciò chì tocca l’indennisazioni chì devi essa tutali, è à u nivellu di u rinnovu di l’allevi cù u costu troppu caru pà contu soiu di l’agnelli.
Steti à senta i spiecazioni di Ghjaseppu Colombani, presidenti di a Camara righjunali d’Agricultura.
