Femu a Corsica demande le report des élections départementales
(A redazzioni d'Alta Frequenza) - U Cumitatu Strategicu hà urganizatu a so 5ima riunioni in fin di sittimana scorsa. C'era di sicuru ind'u prugramma a riforma di l'istituzioni cù a difinizioni nova di i tarritorii è a ghjunta di una guvernenza nova. Pà falla à l'accorta, a dumanda hè di sapè s'ellu ci voli à caccià u nivellu dipartimintali è istituiscia una cullittività unica senza ch'ellu s'assumigliessi troppu à què? S'ellu ci pari di veda un accunsentu inghjiru à a vulintà d'andà ver di una cullittività unica, quistioni di primura devini essa arrigulati malgradu tuttu. In fatti, inde ss'uzzioni chì sarani i maneri pà vutà, comu sarani raprisintati i tarritorii o comu sarani spartuti i posti. Altru prublema, ed hè maiò, quillu di l'almanaccu! S'è l'alizzioni cantunali sarani urganizati à u mesi di marzu, ssa riforma sarà lampata à caternu parchì ùn si vedi micca cunsighjeri eletti chì hè pocu fassi Hara-kiri intrendu ind'una cullittività unica. Ci voli à movasi dunqua, è micca pianament'è bè, com'elli a dumandani certi cunsighjeri tarrituriali di diritta. Com'è sempri, Femu a Corsica s'hè impignatu assai in ssu dibattitu. Pà u gruppu naziunalistu, pari chì a scelta di a cullittività unica s'impunessi, ancu s'è quistioni numarosi fermani sempri senza nisun risposta. D'appressu à ellu, u fattu di rimandà l'alizzioni dipartimintali di marzu à un'antra data saria l'unica suluzioni pà fà sbuccà ssa riforma.
Steti à senta à Ghjuvan Cristofanu Angelini, pà u gruppu Femu a Corsica di l'Assemblea di Corsica.
