Européennes en Corse: l'UMP en tête, forte percée du FN, François Alfonsi troisième

(A redazzioni d'Alta Frequenza) - Ci sò stati l’alizzioni aurupei ssa dumenica. Prima insignamentu, quissi quì avarani appassiunatu torna menu cà in Francia cuntinintali, postu chì 64,48% di i scritti ùn sò micca andati à vutà, vali à dì di più di pettu à a media naziunali. È s’è ind’a circuscrizzioni ditta Sud Est, com’è inde tutti l’altri fora di l’Ile de France è l’Outre Mer, hè u Front National chì hè ghjuntu à u prima postu largamenti, in Corsica, hè l’UMP chì hà racoltu u più voti cù 26,31%. Ma u partitu di Marine le Pen suvita da vicinu, cù 23,29%. À u terzu postu, c’hè François Alfonsi cù 21,51% pà Régions et Peuples Solidaires. Suvitani dopu a lista PS-PRG cù 9,41%, u Front de Gauche cù 5,99% è Europe Ecologie cù 4,37% pà i partiti i più significativi. Cunsiquenza di a cullata di u Front National in Corsica, cù un risultatu multiplicatu pà quattru di pettu à u 2009, è soprattuttu ind’a circuscrizzioni, nisun diputatu aurupeu corsu andarà in Brussels, François Alfonsi fendu un risultatu troppu debbuli ind’a circuscrizzioni pà tena u so postu, è Franck Giovannucci, cinquesimu di a lista UMP, chì ùn si buscarà micca postu, parchì l’UMP t’avarà solu trè diputati aurupei. S’è in Aiacciu, l’UMP, cù 27,07% hè stata prima cù ondeci voti di più cà u Front National, in Bastia, hè François Alfonsi chì hè passatu davanti à u FN cù setti voti è 26,20%. U partitu di strema diritta hè numaru unu inde cità com’è Bunifaziu, Furiani, Lucciana, Aleria o ancu Venacu, paesi di Paul Giacobbi, induva a lista PS-PRG hè solu terza, trapassata quì dinò da François Alfonsi. Ind'è l'UMP, duva Franck Giovannucci, chì t'avia un postu pà essa elettu, ùn l'hè micca statu di pettu à i risultati naziunali, i risultati di u Front National facini nascia u timori. Una vittoria pà i parsoni micca cunfidenti di pettu à l'Auropa chì faci rifletta dici par asempiu Franck Giovannucci. Eppuru, i risultati di l'UMP in Corsica par ellu sò un segnu di spiranza, ciò chì cunfirmeghja d'appressu à ellu u travaghju rializatu da u so partitu dipoi parechji mesi.

Steti à senta à Franck Giovannucci.