Etudiants interpellés à Corte : rassemblement ce soir devant la caserne de gendarmerie de Borgu
(A redazzioni d'Alta Frequenza) - Parechji studienti di u sindicatu Ghjuventù Indipendentista ani occupatu a sottu prifittura di Corti stamani (ghjovi). Iss'ultimi dumandavani guaranzii da a parti di u Statu inghjiru à una riforma istituziunali, un statutu fiscali dirugatoriu è a cuufficialità di a lingua corsa. I studienti sò stati rinviati da i forzi di l'ordini, ciò chì hà fattu nascia una baruffa. Quattru sò stati arristati, è trasferiti ind'a gendarmeria di u Ponti à a Leccia, nanzi d'essa purtati à a caserna di Borgu in fin di dopu meziornu. L'Università hè stata bluccata di manera simbolica da i ghjovani sindicalisti sempri issu dopu meziornu. Una riunioni trà i trè sindicati studientini di l'Università di Corsica è l'eletti tarrituriali Petru Ghionga è Josepha Giacometti, eppo u presidenti di l'Università Paul Marie Romani hà principiatu à 6 ori in Corti pà pruvà à appacià l'affari; issi trè ultimi aviani scuntratu à meziornu u sottu prifettu. Un'adunita sarà urganizata à partasi da 7 ori stasera, davanti à a caserna di gendarmeria di Borgu.
Sur le même sujet
