Épreuve de philosophie: le sentiment de jeunes lycéens ajacciens
(A redazzioni d'Alta Frequenza) - Principiu stamani (luni) pà i 2542 elevi corsi di u bascigliè 2014. Quist'annu, sò 1 291 scritti à u baccu ghjinirali, 687 à u baccu prufiziunali è 564 pà u baccu tennologicu. Com'è sempri, l'asamini s'hè apartu pà u bascigliè ghjinirali cù una prima prova scritta, quilla chì faci à spessu a paura à parechji sculari, a filusufia. I candidati ani avutu quattru ori pà rifletta, cù trè sughjetti pussibuli, dui dissertazioni è una spiecazioni di testu. In seria literaria, induva a filusufia t'hà u cuefficenti u più impurtanti (7), eccu i sughjetti : "L'opari educani a nostra percezzioni?", "Si devi fà tuttu par essa filici?", o un cumentu di testu annant'à un strattu di La connaissance objective di Karl Popper. Ind'è i scentifichi (prova cù un cuefficenti 3) : "L'artistu hè maestru di a so opara?", "Campemi par essa filici?", o a spiecazioni di un testu di Descartes, strattu da Règles pour la direction de l'esprit. Infini, pà a seria ecunomicu è suciali (cuefficenti 4) : "Basta d'avè a scelta par essa libaru?", "Parchì circà à cunnoscia si sè stessu?", o un testu annant'à un strattu di Condition de l'Homme moderne d'Hannah Arendt. Dumani, ci sarà a seguita di ssi provi di u baccu ghjinirali cù a Storia è a Geugrafia. Rammintemi chì in Corsica in u 2013, u sciffru di riescita à u baccu ghjinirali era di 94,9% (unu di i più boni à u nivellu naziunali), 88,1% à u baccu tennologicu è 79,9% in filiera prufiziunali. Quist'annu, u candidatu u più ghjovanu t'hà quindeci anni è a più vechja cinquanta quattru inde l'isula. I risultati sò aspittati pà u 4 di lugliu.
Steti à senta u sintimu di quattru ghjovani liceani scritti in filiera ecunomicu è suciali à u liceu Fesch in Aiacciu dopu à ssa prova di filusufia.
Sur le même sujet
