Enveloppe de continuité territoriale : l'indispensable rallonge

« Una riunioni di crisa è di cumbattu » : eccu com’iddu l’hà difinitu Jean-Félix Acquaviva u ritrovu trà l’Uffiziu lli Trasporti, u prisidenti llu Cunsigliu Esecutivu è l’attori ecunomichi è suciali di l’isula.
L’ughjittivu era di ripeta è accirtà a nicissità « di fà crescia a dutazioni di a cuntinuvità tarrituriali, da assicurà u sirviziu publicu cutidianu trà Corsica è francia à liveddu aereu è marittimu, par ciò chì tocca à a friquenza, a rigularità, a capacità, i prezza, è u sirviziu in i tarritoria à prò di i corsi », hà dittu u prisidenti di l’Uffiziu lli Trasporti.
« Daretu à quissa ben’intesa ci hè u pinseri lla legi di i finanzi llu 2026 è a instabilità pulitica francesa, chì facini chì par avali ùn ci hè ancu nienti di sicuru pà issu sughjettu di gran’primura », hà dittu in seguitu Jean-Félix Acquaviva.
Eppuri, a cumissioni di i finanzi di l’assemblea francesa avia validatu l’amindamentu di Michel Castellani, ma tuttu ferma à fà in l’emiciculu.
« Ci vol’dunqua à passà da 187 miliona (una dutazioni ch’ùn hè cambiata dipoi u 2009) à una basa anninca di 237 miliona, po’ à fà la evuluà à u ritimu lla crescita lla TVA ugni annu, da permetta d’assicurà a cuntinuvità tarrituriali è a so evuluzioni qualitativa », hà ripresu Jean-Félix Acquaviva.
« Senza iss’affari, u sistema risichighja d’essa distabilizatu à discapitu di i impieca, di i passaghja sanitarii, di u puteri di comprita di i corsi, di i impresi turistichi, di i impresi agrualimintarii à a spurtazioni...
In più di quissa, ci hè u pesu di i normi ambiintali aurupei, in fatti d’amendi à i cumpagnii è di tassi aerei dicisi da u guvernu, dunqua u pesu di dicisioni sterni à a Corsica », hà dinunciatu u prisidenti di l’OTC, pricisendu ch’una « forti cunvirghjenza si hè fatta trà sindicalisti, sucità civili, urganisazioni prufiziunali, ecunomichi, turistichi, agriculi, camari cunsularii è eletti, par difenda à pettu à parigi u cori di i intaressi matiriali è fundamintali di i corsi ».
Tutti l’attori sò pronti à mubilizà si, sicondu l’evuluzioni lla situazioni.
Piddendu in contu iss’ughjittivi, u prisidenti llu Cunsigliu Esecutivu hà da andà à u riscontru di u primu ministru a sittimana ch’entri, par trattà di sughjetti pulitichi, stituziunali, è di iss’urgenza chivi.