Engagement CAPA - SYVADEC : nourrir de grandes ambitions
(A redazzioni d'Alta Frequenza) - A Cumunità d'Agglumerazioni di u Paesi Aiaccinu è u SYVADEC, ani prisintatu in fin di settimana scorsa in Aiacciu a so prima azzioni cumuna, fruttu di a cunvenzioni di prugressu è di scopi firmata calchì mesi fà. Un’azzioni pà valurizà appena di più i testili in Corsica. Da sbuccà ci, più di centu punti di racolta sò stati missi in piazza in parechji lochi di l'isula dipoi dui anni, è nant'à u tarritoriu aiaccinu oramai. Quissi quì si prisentani sottu à a forma di cuntenenti duva poni essa missi inde sacchi sarrati vestiti, scarpi, picculi sacchi, tissuti di mobuli o ancu panni di casa. 45% di issi testili sò ritravaghjati è 40% sò riutilizati grazia à un partenariatu cù parechji associ caritativi incaricati di distribuiscia li à i parsoni ind'u bisognu. Un impegnu forti à u nivellu suciali, ma dinò ambientali. Infatti, nant'à 4 000 tunnellati criati in Corsica, 750 tunnellati sò stati racolti in dui anni. U scopu hè di ghjunghja da quì à pocu trà 2 000 è 2 500 tunnellati racolti à trattà sopralocu, u restu essendu mandatu in cuntinenti. Una dimarchja di mutualisazioni di mezi di i più impurtanti, sicondu u presidenti di u SYVADEC, è nicissaria pà nutriscia ambizioni maiò.
Ecoutez François Tatti.
Sur le même sujet
