Energie : la réponse d'Alain Vidalies à Laurent Marcangeli
(A redazzioni d'Alta Frequenza) - Tuttu trema ma ùn c'hè nulla chì movi ind'u picculu mondu puliticu, energeticu, elettricu è di u gaz di a Corsica è ùn hè micca a quistioni posta dopu meziornu (marcuri) da Laurent Marcangeli à u guvernu chì avarà parmissu di fà avanzà u cartulari di u Vaziu. In fatti, u diputatu d'Aiacciu s'hè intarrugatu, è hà postu a dumanda à u ministru cuncirnatu, di sapè à chì n'era esattamenti u cartulari di a cintrali nova di u Vaziu è soprattuttu chì saria u gennaru di cumbustibuli usatu. A risposta arricata da Alain Vidalies, u Secretariu di Statu in carica di i trasporti, di u mari è di a pesca ùn hà micca datu pà daveru elementi novi. A cintrali nova di Lucciana viaghjarà bè à u gaz grazia à un dipositu stallatu in mari, ma s'è u ministru amenta bè a stallazioni di un cunduttu pà pudè raghjunghja Aiacciu, dici dinò chì a viabilità ecunomica di un veru gazoduc ùn hè micca evidenti. Pari sicura chì, par avà, u Cumitatu di Rigulazioni di l'Energia pighjarà in carica a diffarenza di costu trà u fuel pisivu è u fuel lighjeru, chì sarà dunqua utilizatu dinò pà u Vaziu. A risposta di u ministru duvaria essa analizata cù finezza da l'associ contr'à u fuel chì urganizarani dumani d'altrondi (ghjovi) una cunfarenza di stampa.
Steti à senta à Alain Vidalies.
Sur le même sujet
