Emmanuel Macron veut donner un "avenir" à la Corse au "sein du giron républicain"
(A redazzioni d'Alta Frequenza) - U presidenti di a Republica Emmanuel Macron ùn hà ancu parlatu nant'à u fondu di i cartulari corsi dipoi a so ghjunta in Corsica ssu marti. Malgradu tuttu, duranti u so discorsu mentri l'umaghju à u prifettu Erignac, hà datu calchì elementu. Accumpagnatu da l'anzianu ministru di l'Internu Jean Pierre Chevènement, ciò chì pudaria essa cunsidaratu com'è un gattivu segnu mandatu à l'eletti corsi, u Presidenti hà dittu chì "a ghjustizia di a Republica (avia) pussutu essa resa" è ch'ella saria "suvitata senza cumpiacenza, senza sminticanza, senza annistia". L'annistia chì faci parti di i rivindicazioni maiò di l'eletti di a Corsica firmaria par avà un puntu di blucchimu. Emmanuel Macron hà annunziatu dinò a nicissità di dà un "avvena" à a Corsica "nentru a Republica". "A Republica devi tena st'ambizioni di dà à a Corsica un avvena à l'altezza di i so spiranzi, senza fà cuncissioni cù i dumandi chì a fariani escia da a Republica", hà dittu u Presidenti. Ni pudariami sapè di più dopu u so scontru cù Laurent Marcangeli, u merri d'Aiacciu, dopu meziornu, o dopu à quillu cù Gilles Simeoni è Ghjuvan Guidu Talamoni, privistu in principiu di sirata. C'hè un affari sicuru in tutti i casi, u presidenti darà a so visioni pà l'avvena di a Corsica duranti un discorsu privistu dumani dopu meziornu in Bastia.
