Elections territoriales : la réaction de Paul Giacobbi
(A redazzioni d'Alta Frequenza) - Storicu ! Ùn si sà chì sarà l'altezza di u S da quì à calchì mesi, ma in tutti i casi, hè una parolla ch'è no emi intesu assai ssa dumenica à sera in carrughju in Aiacciu, in Bastia è ancu in altrò. Storicu, parchì s'ellu si pighja com'è attu di principiu di u naziunalisimu corsu l'evenimenti d'Aleria duranti l'istati di u 1975, sò 40 anni chì ssu currenti puliticu in tutti i so cumpunenti, autunumisti, indipendentisti, hè in cerca di ssa vittoria. Storicu, à u mumentu induva a viulenza pulitica hè piantata, à l'ora chì l'audienza di i sfarenti partiti naziunalisti paria annant'à a falata, eccu chì a vittoria ghjunghji d'una manera traputenti. C'hè in fatti più di 10 000 voti d'avanza trà u risultatu uttenutu ssa dumenica à sera da Gilles Simeoni è quillu di Paul Giacobbi, capimachja di l'ultima squadra à u puteri. 52 839 voti, vali à dì più di 35%, contr'à solu 28% pà l'ultimu presidenti di l'Esecutivu, si pò dì chì a vittoria hè chjara è netta. A diritta, ch'è no pudiami senta à un certu mumentu in pusizioni di vincia, si ritrova infini à 27% è 40 000 voti. U Front National hà persu piumi duranti ssu sicondu ghjiru, perdi guasgi 1 puntu è mezu trà una dumenica è l'altra, ma hà racoltu quantunqua più di 13 000 voti chì ani da cuntà oramai. Ci vularà ad aspittà torna podassi parechji ghjorni pà scurticà i risultati, pisà tali o tali data, analizà l'alizzioni di una manera fina, lucalità pà lucalità, ma firmemi pà ssu luni da mani ind'a riazzioni micca tuttu à fattu à caldu. Paul Giacobbi s'hè cuntintatu ssa dumenica à sera di fà una simplici dichjarazioni, cù gravità è à dilla franca dinò di una certa altezza. Filiciteghja "cun ardori" i vincidori di ss'alizzioni è dici ch'ellu voli cuntinuà à l'assemblea di Corsica à travaghjà in u sensu di l'intaressu di l'isula.
Steti à senta à Paul Giacobbi.
Sur le même sujet
