Le Direct

Economie circulaire : anticiper sans oublier l'urgence pour Agnès Simonpietri

(A redazzioni d'Alta Frequenza) - Mentri chì a prublematica di i rumenzuli hè putenti in Corsica, a Cullittività Tarrituriali di Corsica hà urganizatu una riunioni nant'à l'ecunumia circularia in fin di sittimana scorsa. Una riunioni cù un culori aurupeu, postu chì c'era par asempiu Daniel Calleja Crespo, in carica di u dipartimentu di l'ambienti in a Cummissioni Aurupea. L'ecunumia circularia t'hà com'è scopu di fà di i rumenzuli una risorza ecunomica, grazia à u so trattamentu è a so gistioni, essendu à tempu in una dimarchja eculogica. Fà una riunioni inghjiru à l'ecunumia circularia è suluzioni chì ùn poni essa appiecati in furia parchì fatti pà u longu andà pudaria assumigliassi à un affari scemu pà parechji corsi, mentri chì i rumenzuli sò à u centru di una crisa maiò è urghjenti. Eppuru, d'appressu à Agnès Simonpietri, a presidenti di l'Uffiziu di l'Ambienti di a Corsica, l'urghjenza di a situazioni pò essa liata à a vulintà d'anticipà pà l'avvena, postu chì l'ecunumia cirularia hè un mezu d'anticipà. In più di què, a Cummissioni Aurupea ùn mittaria micca da cantu un aiutu d'urghjenza pussibuli pà a Corsica in u quadru di a so gistioni di i rumenzuli sicondu Agnès Simonpietri.

A stemi à senta.