Echecs : Léo Battesti reconnaît sa défaite mais règle ses comptes

(A redazzioni d'Alta Frequenza) - Ind'un cumunicatu publicatu nant'à u situ "Les échecs un sport pour tous", Léo Battesti riagisci dopu à a so disfatta à a presidenza di a Federazioni Francesi di i Scacchi. Iss'ultimu dici ch'ellu ringrazia tutti quilli chì ani vutatu pà a so lista, è prega bona furtuna à Diego Salazar, u novu presidenti. Malgradu tuttu, Léo Battesti, chì ferma sempri presidenti di a Lega Corsa, voli arrigulà i so affari. In fatti, u novu presidenti avaria fattu una campagna micca unesta contr'à ellu, mittendu in dubbitu a so integrità, è fendu rifarenza frà altru à u so passatu di militanti naziunalistu. Eccu una parti di u cumunicatu di Léo Battesti.

Vogliu ringrazià i numarosi clubs chì ci ani fattu cunfidenza inde iss'alizzioni. Sò statu assai fieru di purtà una lista di un nivellu di cumpetenza simuli. Sò filici di veda, ind'i mumenti difficiuli di una disfatta, i centinai di testimunianzi di sustegnu ghjunghjendu da a me isula à parechji bella sicura, ma dinò da tutti i rughjoni di Francia. Aghju prigatu bona furtuna à Diego Salazar calchì minuta dopu à u risultatu di l'alizzioni è a facciu torna par rispettu di tutti issi presidenti di clubs chì ani vutatu par ellu. Ma ùn saraghju micca falsu pà ciò chì mi tocca parchì socu essa filicitatu da quilli chì arimani mittiani in dubbitu a me integrità. Li prupongu, com'è à i so amichi, di ùn fà più uffesi individuali, nè preghjudicati com'elli l'ani fatta duranti tutta a campagna. I Scacchi meritani meghju cà què. Mi cuncitraraghju oramai, di manera sclusiva, à sviluppà ancu di più cà prima i Scacchi in Corsica. T'avaraghju parechji altri partenariati forti chì ci parmittarani d'essa ancu di più parfurmenti è attrattivi à u serviziu di a nostra ghjuventù soprattuttu. In fatti, 90% di i ghjovani corsi trà 6 è 21 annu sani ghjucà à i Scacchi grazia à l'iniziazioni di i nostri vinti furmatori. Ci parmittarà d'essa una tarra d'accolta pà i Scacchi eccezziunali è urganizaremi ancu di più manifestazioni.