Drame de Furiani : Colère et incomprehension
(A redazzioni d'Alta Frequenza) - I vittimi è i famighji di vittimi di a catastrofa di Furiani, di u 5 di maghju di u 1992, chì hà inghjinnatu a morti di 18 parsoni è feriti pà millai di ghjenti, aspittavani da l'istanzi di u ballò francesi una misura simplici, quilla di ùn urganizà più scontri un 5 di maghju in Francia. In fini, issa misura, appiecata ghjustu ghjustu in u 2012, pà i vinti anni di a catastrofa, dopu à una mubilisazioni assai larga, sarà stata solu un'eccezzioni. In fatti, a Federazioni Francesi di Ballò hà dicisu di ùn aduttà micca a pruposta di i vittimi è di i so famighji, dicidendu à a fini di ùn ghjucà più finali di cuppa o scontri in tarra corsa un 5 di maghju, vali à dì chì un club corsu pudarà ghjucà in cuntinenti u 5 di maghju. Una misura chì rindarà dillusi, pà micca dì chì l'ani da rivultà, tutti quilli chì si sò mubilizati pà un duveri di mimoria pà u più grandi drama di u ballò francesi, è chì, di una certa manera, limiteghja issu drama à una dimensioni corsa è basta, mentri chì à mezu à i 18 morti è à i più di 2 000 feriti di a catastrofa, sò parechji à ùn essa micca corsi.
Sur le même sujet
