Drame d'Agosta : procès à huis clos
(A redazzioni d'Alta Frequenza) - Andy Fromageau, issu ghjuvanottu accusatu d'avè tombu a so famighja d'aostu di u 2009 in Agosta, passa dipoi issu dopu meziornu (luni), davanti à a corti d'assisi di i minori di Corsica Suttana. Un prucessu chì si teni, infini, senza a stampa è qualsiasi altra parsona, à a dumanda di unu di l'avucati di a partita civili. A corti hà dittu di sì à issa dumanda, di pettu frà altru à a "fragilità psicologica" di l'accusatu. U ghjuvanottu, 19 anni oghji, era minori quandu chì i fatti sò accaduti. Un gestu ch'ellu ùn hà ancu spiecatu, parlendu solu di una "pulsioni irresistibuli". I partiti civili sò custituiti da i famighji di u babbu è di a mamma, è dunqua di u ghjuvanottu, chì dumandani oghji spiecazioni. I dibattiti durarani fin'è vennari.
