Divorce STC-CGT : la STC ne défilera pas dans les rues le 1er mai
Photo STC
Ghjovi in Bastia, u STC hà fattu sapè in cunfarenza di stampa ch’iddu ùn piddaria u carrughju pà u primu di maghju.
Via Jean Brignole, u so sicritariu ginirali, u sindicatu hà ancu fattu sapè ch’iddu si mittia à u scartu di l’intersindicali mubilizata contru à a riforma lli ritirati.
« Ùn pudemu viaghjà à torru à un’urganisazioni chì hà purtatu in ghjustizia unu di i nosci diligati », hà spiicatu Jean Brignole, fendu rifarenza à i tinsioni chì sò affaccati dopu à l’agrissioni di Xavier Nesa, u capifila di a CGT di l’energia, u 17 d’aprili.
« Issi fatti sò a cunsiquenza d’un’attitudina inghjuliosa contru à u nosciu sindicatu (…). I ghjorna innanzi, sò stati distribuiti stampini intullarevuli, chì trattaiani i nosci eletti di cullaburatori, mittindu ancu in causa a so integrità famigliali. Ciò chì si hè passatu innanzi ci pari ancu più gravu chè l’agrissioni fisica, masimu chì dopu, u nosciu elettu hè statu tasanatu da i riprisintenti di a CGT », hà pricisatu u rispunsevuli sindicali.
Parlendu sempri di i stampini di a CGT, u STC hà fattu sapè ch’iddu si tinia u drittu di purtà l’affari in ghjustizia. Mancu à dì la : hè avanzatu bè u divorziu trà i dui sindicata !
Sur le même sujet
