Divagation animale : le ras-le-bol de l'Association des Maires de Corse-du-Sud
(A redazzioni d'Alta Frequenza) - L'Associu di i Merri di Corsica Suttana voli piantà cù a prublematica di a divagazioni di l'animali ! Accidenti nant'à a strada certi volti dramatichi, parsoni è matiriali tocchi, risichi pà a saluta publica o ancu difficultà finanziari pà i cullittività quandu ci voli à fà riparazioni à parechji : sò prublemi chì i merri ùn volini più cunnoscia. Ss'ultimi battini à prò di a criazioni d'una furiera animali regiunali è chì pudissi mova, chì saria gistita da un sindicatu mistu cù nentru a futura Cullittività di Corsica è i cumuni. Una dumanda sposta grazia à una muzioni chì Jean Toma, secretariu generali di l'associu è cunsighjeru tarrituriali Le Rassemblement, prisintarà duranti a sissioni di ghjovi è vennari di l'Assemblea di Corsica. I merri dumandani dinò cù forza à u prifettu, quand'ellu hè nicissariu, di ghjuvassi infini di u so puteri di sustituzioni in materia di pulizza amministrativa. A divagazioni di l'animali, una prublematica bella vechja chì pudarà essa arrigulata solu cù un veru travaghju trà tutti i parti, i cullittività lucali, u Statu, o ancu l'agricultori.
Steti à senta à Joselyne Mattei Fazi, a presidenti di l'Associu di i Merri di Corsica Suttana.
Sur le même sujet
