Deux enquêtes préliminaires financières viseraient le SC Bastia, qui réagit
(A redazzioni d'Alta Frequenza) - D'appressu infurmazioni di u ghjurnali Le Monde, u SC Bastia saria toccu da dui inchiesti preliminarii di u polu ecunomicu è finanziariu di Bastia chì cuncirnariani suspetti di sopra fatturazioni pà a stallazioni di un tarrenu sinteticu in u 2012 nant'à i stallazioni di u club in Borgu. A siconda inchiesta saria nant'à flussi finanziarii di parechji centinai di millai d'auri ver di una sucità d'imprestitu di vitturi è di un bar bastiacciu. Un articulu chì hà inghjinnatu una risposta di u SC Bastia, chì dici "chì u marcatu di u stadiu cù tarrenu sinteticu di u centru d'intrenamentu di i ghjovani in Borgu, ùn hà cunnisciutu nisun malversazioni nè flussu finanziariu micca regulari", u club essendu in disaccordu cù i so prestatarii ind'u quadru di un prucessu. Pà ciò chì tocca u sicondu cartulari, u club priciseghja chì "i soldi virsati da u club à l'intrapresi partinarii, com'è pà l'imprestitu di minibus pà traspurtà i ghjovani di u centru di furmazioni, sò tutti fundati è ghjustificati", è chì "i conti di u SCB sò cuntrullati di manera rigulari, cuntrolli chì ani inghjinnatu nisun usservazioni". U Sporting dici dinò chì "nisun bar di Bastia o d'altrò travaghja o hà travaghjatu cù u club, è ch'ellu hè falsu è una bucia di scriva chì una struttura simuli hà toccu parechji centinai di millai d'auri di u club", è dici cù sicurezza chì "nisun irregularità esci o hè isciuta da a cuntabilità di u club". Infini, u club bastiacciu priciseghja chì unu di l'autori di ss'articulu "hè cuncirnatu in ssu mumentu da una lagnanza di u club cù custituzioni di partita civili dopu à parolli ditti duranti un'emissioni diffusata nant'à Canal Plus di dicembri di u 2012".
Sur le même sujet
