Des eaux de baignade une nouvelle fois de qualité en Corse
(A redazzioni d'Alta Frequenza) - L'acqua pà bagnassi in Corsica ferma torna di bona o di bunissima qualità à più di 97%. U custatu hè statu fattu a simana scorsa duranti a tradiziunali cunfarenza di stampa urganizata com'è ogni annu à listessa epica da l'Agenza Regiunali di a Saluta nant'à a situazioni sanitaria di l'acqua di i fiumi, di i lavi è di u mari. Pà i dui primi ghjustu appuntu, ferma torna calchì puntu neru cunnisciutu : u Taravu, da Ciamanacce fin'è u ponti d'Abra, induv'ellu hè pruibitu di bagnassi dipoi un arrestatu prifitturali presu in u 2008, in u Ponti Vechju in Bastelica, in Pedigrisgiu (Grisgione) è in Ponte Novu (Castellu di Rustinu nant'à u Golu). Malgradu una situazioni torna nurmali, c'hè sempri una survighjenza nant'à u settori di u Cavu in a parti a più suttana di a Corsica, induva a bilharziose era stata usservata ind'è parechji parsoni, ciò chì avia fattu ch'ellu era difesu l'accessu à u fiumi in u 2014; ci vultaremi di manera specifica ind'i nostri nutiziali chì venini. Di manera generali dunqua, ùn c'hè pinseri ad avè : ognugnu pudarà apprufittà duranti a statina di i fiumi, di i lavi è di u mari in Corsica.
Steti à senta à Josselin Vincent pà l'ARS.
Sur le même sujet
