Découverte macabre dans le Lancone : les membres retrouvés en Balagne
(A redazzioni d'Alta Frequenza) - Dopu a scuparta marti di u cadavaru di un omu senza membri nè capu pà i lochi di Lancone, elementi novi sò stati cumunicati nant'à ss'affari ssu ghjovi da u prucuratori di a Republica di Bastia. Duranti una cunfarenza di stampa, Nicolas Bessone hà annunziatu chì i bracci è i ghjambi brusgiati di a vittima sò stati ritrovi in Balagna ssu marcuri dopu meziornu da una parsona chì facia una spassighjata, sottu à un arburu nant'à a strada dipartimintali trà u Ponte à a Leccia è Belgudè. A distanza trà i dui lochi hè di una quarantina di chilometri, hà aghjustatu u prucuratori. L'autopsia, rializata stamani, hà fattu spuntà a prisenza di una vintina di piaghi di una cultella, ciò chì saria à l'urighjini di a morti di a vittima. L'inchiesta cuntinueghja.
