Décision gouvernementale pour le dossier énergétique corse : au travail !
(A redazzioni d'Alta Frequenza) - Una struttura di gaz naturali sarà stallata à u meziornu di Bastia ; arricà u gaz cù un "pipe" à a cintrali di Lucciana, eppo cù un antru cunduttu à quilla di u Vaziu in Aiacciu. Un schema cunnisciutu dipoi un pezzu cuncirnendu u cartulari energeticu corsu, ma inquadratu oramai da un puntu di vista naziunali. In fatti, ramintemi chì ind'una lettara di u 18 di marzu, mandata à Paul Giacobbi, Ségolène Royal voli ramintà l'evuluzioni di u cartulari energeticu di a Corsica. A ministra di l'Eculugia, di u Sviluppu Durevuli è di l'Energia ramenta chì, ind'u quadru di u prughjettu di legi annant'à a transizioni energetica, a Cullittività di Corsica devi metta in ballu cù u Statu, nanzi à u 31 di dicembri di u 2015, una nova Prugrammazioni Pluriannuali di l'Energia. Ségolène Royal insista ancu annant'à u fattu ch'ella ferma assai attenti pà ciò chì tocca u rispettu di ssa data, è dumanda dunqua à i partinarii, a ramintemi u Statu è a CTC, di mettasi à travaghjà u più prestu pussibuli. Aghjusta ch'ellu ci vularia chì una prima virsioni di a PPE sighi aduttata nanzi à ss'istati. U 23 d'aprili, u Cunsighju di l'Energia, di l'Aria è di u Clima di Corsica sarà urganizatu di fattu cù ssu quadru guvernamentali. Una dicisioni chì parmittarà di libarà parechji pussibilità, finanziarii par asempiu, da fà chì l'uparatori GDF pudissi lancià u prughjettu è i sfarenti studii in a materia.
Steti à senta à Maria Giudicelli, a cunsighjera esecutiva in carica di u cartulari energeticu à l'assemblea di Corsica.
