Débat sur la desserte maritime : la satisfaction d'Alain Mosconi
(A redazzioni d'Alta Frequenza) 26 – 6 – 19 ! Pà quilli chì ùn la sappariani ancu, hè u risultatu di u votu di l’assemblea di Corsica chì, vennari à sera, s’hè prununziatu nant’à u novu cartulari di u serviziu maritimu di l’isula. 26, a maghjurità hè assuluta, ma debbuli di pettu à i spiranzi chì ognunu mittia pà un accunsentu assai largu nant’à una quistioni guasgi esistenziali pà a Corsica, quilla di i so trasporti. 6, sò i voci di quilli chì bramani sempri un paradisu duva a Corsica arrigularia infini a so prublematica di i trasporti maritimi alluntanendu a maghjina fosca di i cunflitti suciali. Sò i voti di a maghjurità righjunali, più quilli di u campu liberali, menu i sei voci di u gruppu cumunistu. In fatti, quissu quì privedi dighjà l’infernu pà un rigulamentu sfattu, di un serviziu publicu à pezzi è à buccò è dunqua una sorti para pà l’impiecu à a SNCM. I 19, sò infini i voti di i dui gruppi naziunalisti, raghjunti da Corse Social Démocrate, chì ùn si sò micca prunuziati pà un testu chì pò essa mighjuratu ma chì pò incuragiscia quantunqua. Sintendu di manera guasgi sicura u risultatu di u votu, Marc Dufour, u PDG di a SNCM, ùn s’era micca spiazzatu in Aiacciu, inveci di u vennari di prima. Frédéric Alpozzo, pà a CGT di a cumpagnia era quì ellu, ma si n’era andatu da l’emiciculu nanzi à a fini di i dibattiti. Emi dighjà intesu a so dillusioni è a so amarezza. L’altru sindicatu di a SNCM era quì dinò è hà aspittatu a fini di a seenza pà fà senta una suddisfazioni cuntrullata. Parchì ?
Écoutons la réponse d'Alain Mosconi, pour le STC des marins.
