CTC : un rapport politique pour lutter contre la pauvreté
(A redazzioni d'Alta Frequenza) - L'Assemblea di Corsica hà aduttatu à l'unanimità, menu l'astenzioni di u gruppu cumunistu, u raportu nant'à a strategia rilativa à l'elaburazioni di un pianu di lotta contr'à a precarità. Aldilà di i misuri suciali presi fin'è tandu, hè un prughjettu puliticu veru chì l'esecutivu hà prupostu. D'altrondi, sicondu François Pernin, u presidenti di a CLE (Cuurdinazioni di Lotta contr'à a Sculsioni) chì hà suvitatu ssu dibattitu cù gran'primura, u fattu di veda ssu prublema di a precarità è di a puvartà da un puntu di vista puliticu hè una vera rivuluzioni, a prima volta ch'ella accadi ancu in Francia. Aldilà di i mezi pà a risuluzioni di ssu prublema maiò di a sucità corsa, bisognu ad avè oghji una presa di cuscenza essenziali, sicondu u presidenti di a CLE è quillu di l'Esecutivu.
Vultaremi di manera larga nant'à ssu sughjettu in a nostra emissioni Sucità Viva a sittimana chì veni, cù parechji invitati è tistimunianzi.
