Corse-Créole : annonce discriminatoire ou pas ?
(A redazzioni d'Alta Frequenza) - À l'ora duva l'Assemblea di Corsica s'appronta à metta in ballu u so prughjettu di co ufficialità di a lingua corsa, è chì parechji voci à venti cuntrarii si facini senta, frà altru da u cantu di certi sindicati, ammintendu timori diversi di pettu à l'intrata di issa stessa lingua ind'i criterii di ricrutamentu, un'antra isula, o in tutti i casi una di i so intrapresi, pari pighjà un'avanza ind'a materia. U situ Corsica Infurmazione hà in fatti rilevatu issu marcuri un'ufferta d'impiecu inde l'intrapresa EDF Martinique, publicata nant'à l'indirizzu internet DOMemploi.com, chì ricerca un tennicu cuntrollu cumanda omu o donna, pà un postu in Fort de France. Un'ufferta ben intesu nurmali, di pettu à u cuntestu socio culturali lucali, ma chì porta parechji intarrugazioni in Corsica. Hè dumandatu in fatti à u futuru impiecatu, aldilà di i cumpetenzi teorichi è pratichi nicissarii, d'avè "di modu ubligatoriu una bona ammaistranza di a lingua creola". S'è iss'ufferta, com'ella hè prisintata, pari avè fattu nascia nisun riazzioni di l'amministrazioni, omu ùn si pò impidiscia di pinsà à un antru asempiu, corsu stavolta. In u 2008, un'intrapresa di Purtivechju, pà impiecà una secretaria in rilazioni cù una clientela rurali, pricisava ind'a so ufferta ch'ella li "piaciaria à avè una parsona corsofona". Una pulemica di i più putenti era accaduta dopu, frà altru à traversu una riazzioni forti di u direttori di l'ANPE di Corsica di l'epica, Antoine Peretti, intarrugatu nant'à i nostri ondi u 7 di maghju di u 2008, ammintendu una discriminazioni. Ferma oramai à sapè s'è, da u cantu di u mari di i Caraibi, calchì riazzioni o micca hà da spuntà nant'à a furmulazioni di iss'ufferta d'EDF. Tandu, è ind'u cuntestu corsu attuali, ognunu si pudaria dumandà s'è a difinizioni di a parolla "discriminazioni" è i so cunsiderazioni sò listessi o micca da un'isula à un'antra...
Sur le même sujet
