Coronavirus en Corse : Taux d'incidence supérieur au seuil d'alerte national selon l'ARS
U siscu llu Covid 19 circulighja è bè in Corsica. À l’affaccà lli vacanzi di i Santi, l’ARS è a prifittura avviani un pianu pà u vaghjimu, da limità a stesa llu siscu è pruteghja i più debbuli.
«U tassulu d’incidenza in Corsica, da u cinqui à l’undici d’uttrovi, franca a limita d’alerta naziunali è tocca i 86,9 par 100 000 abitanti. Issu tassulu hè in crescita bè ind’è quiddi chì francani i 65 anni.
I inchiesti da suvità i cuntatti mosciani chì i cuntaminazioni si facini pà u più in famidda o trà amichi. Sò stati d’altrondi idintificati parichji casi accolti in famidda. Un puntu di sei parsoni pusitivi hè statu scupartu in una squadra di sport cullittivu in Aiacciu » dici l’ARS.
« Cù i vacanzi di i Santi, s’affacca u ritrovu in famidda, cù studianti chì voltani da loca ind’iddu curri bè u siscu. Issi mumenta di spartera ùn devini fà sminticà ch’iddu hè chivi. Puri par essa difficiuli, s’arricumanda à ugnunu d’ùn abbraccià si tantu, à tempu sbarcatu à l’aeruportu » dici ancu l’Agenza Righjunali lla Saluta, chì cunsiglia à ugni parsona chì ghjunghjaria in Corsica di fà una virifica RT-PCR, 3 ghjorna innanzi di vena o à tempu sbarcata, da pruteghja famidda è amichi.
Eccu chivi i loca induvà fà issi virifichi : www.santé.fr"
Sur le même sujet
