Coronavirus : 17 personnes testées positives en Corse entre le 1er et le 14 juillet
À parta si da oghji, l’ARS si hè rimissa à fà u puntu ugni ghjornu, par ciò chì tocca à a situazioni llu Covid 19 in Corsica.
Da u 1u à u 14 di luddu, sò stati cuntabilizati 17 virifichi pusitivi (15 in Pumonti è 2 in Cismonti).
3179 provi RT PCR sò stati fatti (2428 in Pumonti, 751 in Cismonti).
Trà mezu à issi virifichi pusitivi, certi pudariani vena da cuntaminazioni anziani. Intantu di sapè ni di più, s’avvia a inchiesta pà i parsoni in cuntattu, è sò presi misuri di missa à u scartu, dici l’ARS.
12 parsoni sò sempri à u spidali : 11 in Aiacciu è una in Bastia. Ma si parla chivi d’uspitalisazioni vechji.
Ramenta l’ARS chì issa duminicata, hè sbucciatu un puntu di cuntaminazioni in una famidda in Portivechju. Parsoni d’issa famidda sò stati virificati pusitivi, è missi à u scartu.
Cù a inchiesta, sò stati idintificati 30 parsoni in cuntattu, chì sò stati missi à u scartu.
Più chè mai, s’arricumanda à ugnunu d’ùn sfrancà si la di i gesti di sicurità sanitaria. S’arricumanda di purtà una mascara, masimu in i loca induv’idd’ùn si pò mantena un scartu fisicu.
Par finiscia, à l’affaccà di u minimu segnu, meddu saria à chjamà u so medicu o u 116 117. Sè l’affari pari nicissariu, u medicu vi pudarà urdinà una virifica, è vi diciarà chì fà.
