Conseil municipal de Bastia : débat agité autour des déchets
(A redazzioni d'Alta Frequenza) - Dopu à un prugramma micca famosu, hè un dibattitu chì ùn era micca privistu chì hà animatu a seenza di ssu marti di u cunsighju municipali di Bastia, direttu da a prima aghjunta, Emmanuelle de Gentili, postu chì Gilles Simeoni era assenti. Un dibattitu iniziatu da Francis Riolacci inghjiru à a prublematica di i rumenzuli, di più in più cumplessa i ghjorni passendu cù a sarratura di tutti i centri di Corsica. In ssu dibattitu, u cunsighjeru sucialistu Philippe Peretti hà dinunziatu a mancanza d’anticipazioni di u SYVADEC sicondu a so analisi. A riazzioni di François Tatti hè stata putenti, ramintendu parechji prughjetti chì ùn sò micca sbuccati par via di una mancanza di sustegnu di certi puliticanti, cù Femu a Corsica in prima ligna. Una dinunzia divintata numinali quandu u cartulari di u ruminzulaghju di Cervioni hè statu amintatu da u presidenti di u SYVADEC, chì hà missu in avanti u pesu d’Agnès Simonpietri, cunsighjera tarrituriali Femu, in a sarratura di quissu quì. Hè à ssu mumentu quì chì un antru cunsighjeru tarrituriali Femu, Hyacinthe Vanni, prisenti in u publicu, hà interpellatu cù forza à François Tatti, inghjinnendu un mumentu di cunfusioni. In tutti i casi, François Tatti hà ricunnisciutu l’assenza di un pianu B di pettu à a prumessa chì ùn hè micca stata tinuta da Ségolène Royal, è hà mandatu torna u so missaghju à a pupulazioni di a CAB pà spiccà i rumenzuli à u più.
Steti à senta à François Tatti.
Sur le même sujet
