Conseil constitutionnel: 1 an d'inéligibilité pour Paul-Marie Bartoli !
(A redazzioni d'Alta Frequenza) - 1 annu d'ineligibilità pà Paul Marie Bartoli: eccu a dicisoni di u Cunsighju custituziunali contr'à u presidenti di l'Uffiziu di i Trasporti, ind'un affari nant'à i conti di campagna di quissu quì. Iss'ineligibilità và da u 24 di maghju di u 2013 à u 24 di maghju di u 2014. Vali à dì ch'ella tocca i mandati futuri di l'elettu, chì teni u so postu di cunsighjeru esecutivu, presidenti di l'uffziu di i trasporti è merri di Prupià. Paul Marie Bartoli, ch'è n'avemi chjamatu à u telefunu, dici "ch'ellu ùn capisci micca issa dicisioni", soprattuttu chì nanzi à a presa in carica di u cartulari da u Cunsighju custituziunali, à parè soiu, ùn s'hè micca pussutu spiecà à a cumissioni di cuntrollu. Pà quissu quì, "a cumissioni naziunali di cuntrollu di gistioni di i conti di campagna ùn hà micca rispittatu u cuntradittoriu". Nant'à i municipali chì venini, di marzu di u 2014, u merri attuali di Prupià ùn hè micca intimuritu. "S'è t'aghju a cunfidenza di l'abitanti di Prupià, truvaraghju una suluzioni cù l'altri membri di a me lista, pà pudè vultà di ghjunghju di u 2014".
Sur le même sujet
