Conflit SNCM : vive réaction de Paul-Marie Bartoli
(A redazzioni d'Alta Frequenza) - Cunfarenza di stampa stamani (vennari) di Paul Giacobbi è di Paul Marie Bartoli pà fà un puntu annant'à a situazioni ind'i trasporti marittimi. U presidenti di l'Esecutivu di Corsica hè francu : u Statu assicureghja mancu appena a libertà di circulazioni, è què malgradu una dicisioni di ghjustizia chì dà l'ordini di fà intarvena a forza publica. L'Esecutivu di Corsica custata chì i porti di L'Isula Rossa è di Purtivechju sò stati bluccati, è sò stati sbluccati solu dopu à intarvinzioni chì ùn cuncernani micca u Statu. Paul Giacobbi manda un missaghju assai chjaru à u Statu : a CTC hà dicisu di metta in opara qualsiasi ricorsu d'indennità contr'à quissu quì pà pudè copra tutti i danni inghjinnati da ssu blucchimi. Hà incuraghjitu dinò a CMN à fà valè i so diritti pà l'indennisazioni. Infini, travaghja in ssu mumentu cù i socioprufiziunali pà pudè asaminà i pussibilità d'indennisazioni à qualsiasi altra parsona chì cunnosciaria cunsiquenzi. U presidenti di l'Esecutivu di Corsica dumanda subbitu à a SNCM d'assuma i so ubligazioni. In u casu cuntrariu, saria purtatu à fà appiecà da quì à calchì ghjornu una dicisioni di ghjustizia ublighendu a SNCM à rimbursà l'aiuti chì sò stati accurdati. Paul Giacobbi cita tandu u sciffru assai impressiunanti di 200 millioni d'auri chì ùn sariani micca virsati à a cumpagnia dilegataria. Pà contu soiu, Paul Marie Bartoli hà vulsutu riagiscia cù viulenza à l'uccasioni ch'ellu ricevi contr'à ellu dipoi parechji ghjorni. Senza vulè ghjudicà l'azzioni intrapresa arisera annant'à u portu di Purtivechju, situazioni gravia chì avaria pussutu inghjinnà cunsiquenzi dramatichi ancu à u nivellu umanu, hà vulsutu dinunzià l'utilisazioni pulitica chì hè stata fatta inghjiru à ssa situazioni.
Steti à senta u presidenti di l'Uffiziu di i Trasporti.
Sur le même sujet
