Conférence de presse de l'Association La Marie Do
(A redazzioni d'Alta Frequenza) - L'associu La Marie Do tinia ssu vennari dopu meziornu una cunfarenza di stampa pà vultà nant'à l'evenimenti di stamani nant'à a piazza Miot. Dopu a burrascata accaduta in Aiacciu, a manifistazioni chì apria i fistività di u 10esimu anniversariu è chì accuglia guasgi 300 zitelli di i scoli di a cità, hà cunnisciutu disguasti impurtanti. Vintitrè parsoni sò stati feriti lighjeri, dui altri di manera più seria. A vita di ss'ultimi ùn hè micca in periculu. Appena accadutu l'accidenti, un dispusitivu largu di succorsu hè statu missu in ballu. I zitelli sò stati aduniti subbitu è presi in carica inde l'uspidali Eugénie. I feriti sò stati curati sopralocu o purtati à l'uspidali di a Misericordia. Spinghjifochi, servizi accademichi è di a cità ani travaghjatu insemi. U pianu di salvezza hè statu missu in ballu. Pà a presidenti di l'associu La Marie Do, i primi pinsati vani à i feriti. Tutti i manifistazioni di a dumenicata sò annulati è i piazzi cumprati pà i sfarenti cuncerti pudarani essa rimbursati. Ci hà da vulè à ripighjà fiatu dopu pà ùn perda di vista u scopu d'aiutà i malati di u cancaru.
Steti à senta à Catherine Riera.
