Conditions météorologiques : la Corse toujours en vigilance Orange
(A redazzioni d'Alta Frequenza) - A più grandi prudenza hè torna una volta racumandata. L'uffensiva di a nevi hè stata doppia stanotti (di marti à marcuri), è a reta stradali hè dinò assai disturbata stamani (marcuri). A Corsica ferma sempri in vigilenza aranciu è l'autorità racumandani di limità a circulazioni à u più. Nevi da u pontu d'Auccià à a surtita d'Aiacciu fin'è in Balagna pà l'assu u più impurtanti, ma dinò ind'a maiò parti di i cumuni di l'internu. Nivati novi sò annunziati à altitudina bassa. A bocca di Vizzavona pò essa francata solu da i veiculi lebbii cù cateni. Hè pruibita à i veiculi articulati è à i "poids lourds". L'altri bocchi di i reti dipartimintali è naziunali poni essa francati solu cù arnesi spiciali. Inveci, i bocchi di Bavedda è di Tartaveddu (iss'ultimu pari via d'arburi fasciati nant'à a strada) sò pruibiti à a circulazioni. I servizii di succorsu ani appruntatu mezi nant'à l'isula sana, ma ancu di grazia nisuna intarvinzioni particulari hè stata rializata. Altra cunsiquenza di issi nivati forti, parechji casi sò privi d'elettricità inde tutta a Corsica. L'intarvinzioni di i servizii di EDF essendu difficiuli di pettu à i cundizioni meteurulogichi. In Corsica Suttana, issi disturbi toccani i cumuni di Vicu, Bastelica, Palleca, Pitretu è Bicchisgià. Da nutà infini chì i trasporti sculari ùn si facini micca nant'à i dui dipartimenti. Torna una volta, a più grandi prudenza hè racumandata. Rinsigneti vi puru nanzi à qualsiasi spiazzamentu chjamendu à u PC strada à u 04 95 46 17 12.
Sur le même sujet
