Conditions météo défavorables
(A redazzioni d'Alta Frequenza) - I servizii di Météo France annunziani un episodiu d'acquati forti soprattuttu nant'à u latu à punenti di a Corsica Suttana. Quissu quì cumencia ind'a sirata (stasera) è cuntinueghja fin'è dumani in principiu di matinata. I cumuli d'acqua aspittati sò trà 20 è 50 mm, pà certi lochi 50 à 70 mm. Cù u timpurali, iss'acquati poni essa ancu più forti. Issu disturbu inghjenna una calata impurtanti di i timperaturi. In fin di matinata, a limita acqua/nevi hè trà 1000 è 1200 metri è cala à 800 metri in principiu di notti. I valori aspittati sò trà 15 è 30 cm situati trà 1100 è 1200 d'altitudina ; 5 à 10 cm, 15 cm pà certi lochi à 1000 metri ; 1 à 2 cm à 800 metri. Un ventu forti accumpagnarà iss'avenimenti meteurulogichi, inghjinnendu marosuli forti di 3 metri drenti à i golfi di u latu à punenti (frà altru Aiacciu è Sagone). Issu fenomenu di marosuli faci chì u nivellu di u mari s'alza, altezza stimata à 17 cm, ciò chì pò fà crescia u fenomenu d'inundazioni ind'i lochi i più sposti. Di pettu à issi cundizioni meteurulogichi pessimi, a più grandi prudenza è a vigilenza sò racumandati duranti i spiazzamenti è ind'i zoni chì poni essa inundati di solitu. Hè cunsighjatu di fà casu nant'à i stradi, di limità a vitezza, di rinsignà si nanzi di fà qualsiasi spiazzamentu.
Sur le même sujet
