Concert "Les Copains d'abord": Il aura lieu dans des conditions uniques
(A redazzioni d'Alta Frequenza) - "U cuncertu sarà urganizatu inde cundizioni unichi" : sò i parolli di u diputatu è merri d'Aiacciu nant'à u cuncertu "Les copains d'arbord", chì sarà arrighjistratu ssu vennari nant'à a piazza di u Diamanti è diffusatu à a riintrata nant'à France 2. Dopu à un avisu negativu di a cumissioni di securità stamani, cuncirnendu l'accolta di u publicu nant'à una lastra di a piazza di u Diamanti, autorità municipali è urganizatori ani dicisu chì u cuncertu saria mantinutu ma chì u publicu saria adunitu aldilà di a piazza. Un arrestatu municipali hè statu presu pà difenda tutti l'aduniti nant'à a lastra di u Diamanti. I carrughji vicini sarani missi à dipusizioni di u publicu è screni giganti sarani stallati pà diffusà a sirata. Nisun scartu sarà accittatu pà ciò chì tocca a prisenza di u publicu nant'à a piazza. Un spiritu di rispunsabilità soprattuttu pà u diputatu è merri, chì vulia mantena a festa è lacà à tempu nisun risicu pussibuli pà i so citadini. U focu d'artifiziu hè mantinutu dinò. Laurent Marcangeli hà annunziatu dopu chì più nisun cuncertu saria oramai urganizatu nant'à u Diamanti, prima chì studii apprufunditi sighini prisintati. Hà incalcatu bè nant'à un affari : u solu risicu pussibuli tocca i cuncerti, l'altri manifistazioni poni essa urganizati d'una manera nurmali.
Steti à senta à Laurent Marcangeli, u diputatu è merri d'Aiacciu.
Infurmazioni nant'à a circulazioni è u staziunamentu nant'à u www.ajaccio.fr
