Communauté d'Agglomération de Bastia : budget primitif 2017 adopté sans encombre
(A redazzioni d'Alta Frequenza) - Ssu ghjovi, u Cunsighju Cumunitariu di a Cumunità d'Agglumerazioni di Bastia t'avia u so chì fà cù l'eserciziu fastidiosu di u bughjettu primitivu. È infini, dopu à dibattiti propiu curretti è a prisintazioni di u raportu appruntatu da u vici presidenti di a CAB è merri di Santa Maria di Lota, Guy Armanet, è i so sirvizi, u bughjettu primitivu hè statu aduttatu à l'unanimità menu Francis Riolacci è Jean Zuccarelli chì ùn si sò prununziati nè à prò, nè contru. S'è ss'ultimi ani fattu sapè a so inchietudini di pettu à a calata di i mezi arricati da u Statu è a mancanza di visioni à longu andà, mentri chì pà l'elettu bastiacciu Jean Joseph Massoni, un squilibriu di u bughjettu hè statu dinunziatu nanzi à i ricetti supplementarii di u 2016, d'una manera glubali, ssu bughjettu hà cunvintu. Cù 56,2 millioni d'auri di spesi, frà i quali 8,5 millioni didicati à u pianu pluriannuali d'investimentu, quissu quì voli essa più ambiziosu. Malgradu tuttu, a CAB hà pruvisiunatu 1,1 millionu d'auri pà pudè anticipà una crisa di i rumenzuli duranti a statina, mentri chì u stadiu Armand Cesari chì farà l'ughjettu d'un millionu d'auri di travaghji d'intrattenu, vedi u so pighjunanti maiò, u SC Bastia, avè calchì ritardu inde u rigulamentu di a so cunvenzioni d'occupazioni sicondu a CAB.
Steti à senta à François Tatti, u presidenti di a CAB.
