Colonisation de peuplement: "la situation est grave!" affirme Jean-Guy Talamoni
(A redazzioni d'Alta Frequenza) - 20 000 abitanti di più in 5 anni, guasgi 75 000 trà u 1982 è u 2011, u puteri attrattivu di l'isula ùn cala micca è pari essa ancu più forti dipoi ss'ultimi anni. Ùn ci voli micca à creda chì a Corsica apprufitteghja di un baby boom chì ni faria u rughjonu cù a crescita di pupulazioni a più alta ghjustu dopu à u Languedoc Roussillon. Tutti i rughjoni duva ella cresci a pupulazioni, fora di u rughjoni parighjinu di sicuru, sò rughjoni chì t'ani un puteri attrattivu forti pà i residenzi sicundarii; di manera chjara, omu và à stallà si è pighjà a so ritirata duv'ellu si campa bè. A Corsica hè tocca dinò ella è ssa tindenza inghjenna di sicuru a ghjunta di una pupulazioni ghjovana è attiva nicissaria à i servizii liati à ssa crescita; tutti quilli chì vani à fà i so corsi sani di cosa si parla. Hè ghjustu appuntu ssa prublematica chì hè stata presa in contu da tutti quilli, è sò numarosi, chì si sò mossi pà a redazzioni di u Padduc parchì inghjenna ben intesu cunsiquenzi assai impurtanti nant'à a vita ecunomica, suciali è culturali di l'isula. I muvimenti naziunalisti, soli duranti un tempu longu, ma di menu in menu soli oghji, ani sempri qualificatu ss'evuluzioni cù un tarmini assai pricisu: a culunisazioni di pupulamentu. Sughjettu piattu pocu fà, quissu quì hè accittatu meghju oghji? Corsica Libera hà vulsutu riagiscia dinò à ciò chì li pari essa una situazioni gravissima pà a Corsica.
Steti à senta à Jean Guy Talamoni.
Sur le même sujet
