Collectivité unique : forum citoyen à la veille de la venue de Manuel Valls en Corse
(A redazzioni d'Alta Frequenza) - Si ni sà oramai di più nant’à a visita di u Prima ministru Manuel Valls luni chì veni in Corsica. Sarà accumpagnatu da Jean Michel Baylet, ministru di l’Accunciamentu di u tarritoriu, Najat Vallaud Belkacem, ministra di l’Educazioni naziunali, d’Emmanuelle Cosse, ministra di l’alloghju è Christian Eckert, secretariu di Statu in carica di u bughjettu. Una visita in Aiacciu in prifittura è à l'Assemblea di Corsica frà altru, o ancu in Bastia cù un passaghju in casa cumuna. Annunzi cuncirnendu a Cullittività unica, a lingua corsa o ancu l’arrestati Miot sò aspittati ramintemula. I presi di pusizioni, i cunfarenzi di stampa è ancu i fori citadini sò stati urganizati duranti a simana. L'Associu Sulidarità è a Liga di i Diritti di l'Omu calchì ghjornu fà ani vulsutu alertà a dilegazioni ministiriali nant'à a sorti di i prighjuneri pulitichi corsi. Ssu ghjovi à sera in Aiacciu, u Cunsighju dipartimintali di Corsica Suttana è dinò tutta a diritta pumuntinca s'erani aduniti pà validà una presa di pusizioni è falla cunnoscia à u Prima ministru. I parlementarii di Corsica Suttana erani quì, com'è u senatori Jean Jacques Panunzi, chì dopu avè rispostu à i dumandi di u publicu ani criticatu cù putenza u prughjettu di a cullittività unica com'ellu hè privistu par avà da u guvernu. Un foru citadinu par chì fà ?
Hè ciò ch'emi dumandatu à Camille de Rocca Serra, u diputatu di Corsica Suttana.
