Collectivité unique et arrêté Miot votés par les députés: réaction de Laurent Marcangeli
(A redazzioni d'Alta Frequenza) - Hè appena dopu à mezanotti ssu marcuri chì l'Assemblea naziunali hà ratificatu u prughjettu di legi nant'à i trè urdinanzi di a futura cullittività di Corsica. In un emiciculu guasgi biotu, solu una quindecina di diputati, u votu s'hè fattu menu quilli di i diputati les Républicains. Ghjustu dopu, u testu nant'à a risuluzioni di u disordini di pruprietà hè statu dinò aduttatu guasgi à l'unanimità, menu u votu di u diputatu De Courson. Riazzioni à diritta è pà les Républicains di Laurent Marcangeli. U diputatu è merri d'Aiacciu hè dillusu di l'aduzzioni di ssa riforma "di bassu nivellu" d'appressu à ellu. Hè di sicuru un mumentu impurtanti pà a Corsica a fusioni di i trè entità amministrativi, ma un appuntamentu mancatu cù a storia sicondu l'elettu. Un elettu chì s'hè filicitatu da un'antra banda chì a so ultima presa di parolla à l'Assemblea naziunali sighi stata quilla pà difenda, à tempu ad altri parlementarii isulani, a prulungazioni di l'Arristatu Miot, un bellu asempiu d'unità, hà dittu quissu quì. Ma pà Laurent Marcangeli, s'è a Corsica devi truvà tutta a so piazza in a Republica, ùn devi micca metta da cantu i tarmini d'autunumia, di riformi istituziunali è custituziunali. Un'autunumia ch'ellu dumanda u diputatu.
Steti à senta à Laurent Marcangeli.
