City Trail Impérial : recueillement et hommage à Ajaccio
Photo ville d"Ajaccio
Ci hè stata forti l’emuzioni à u City Trail Imperial, partitu da u molu l’Herminier, in Aiacciu.
A cursa hè stata didicata à Pierre-Louis Giorgi, « par ricurdà si, par fà li onori è sparta una stunda greva d’emuzioni », hà spiicatu a cità d’Aiacciu.
I so amichi l’ani resu umaghju aprindu a manifistazioni, è i tanti parsoni prisenti ani sciaccamanatu una minuta à a so mimoria.
Pà Stéphane Sbraggia, « iss’evenimentu hè un pocu d’iddu, di i valori di sulidarità, di benvulanza, di ginirosità è di curaghju ch’iddu purtaia.
Issi valori erani i soi in u so cutidianu di spinghjifocu, chjamatu ch’iddu era à salvà viti, è in a so attività d’aducatori spurtivu à u Ring Ajaccien, à u sirviziu di a noscia ghjuvantù ».
U merri d’Aiacciu hà vulsutu ringrazià « l’aienti prisenti è quiddi ch’ani cursu chì, cù a so prisenza, si sò liati à iss’umaghju, ma ancu l’agenti di a cità d’Aiacciu, i membri di i squadri spurtivi è i benevulanti chì ani aiutatu à urganizà, malgradu tuttu, issu City Trail beddu particulari ».
Hè da nutà in chjudenda, è ben’ch’idda sichi rilativa in issa circustanza, a bedda prova d’Axel Mondain : « forsa sarà quissa a me più bedda vittoria, masimu chì no’ semu stati accumpagnati sinu à a cuddata d’EDF da issa filara di parsoni. Quissa ci hà incuraghjiti è datu forza sinu à l’ultima », hà dichjaratu cù emuzioni quiddu chì, pà a prima volta, hà vintu issa cursa.
Sur le même sujet
